Azercell və Nar Mobile
Azercell və Nar Mobile

İcraçı direktor: ““Azercell” hər iki şirkətin abunəçilərinə qarşı hörmətsizlik edir”

Bu gün “Azerfon” MMC-nin (NarMobile) baş icraçı direktoru Gido Helbix “Azercell Telekom” MMC-nin iyulun 21-də yaydığı açıqlamaya münasibət bildirib.

Lent.az-ın müxbirinin verdiyi xəbərə görə, Gido Helbix belə halın ilk dəfə olmadığını, “Azercell”in “Azerfon”a qarşı qara piar apardığını deyib: ““Azercell” hər iki şirkətin abunəçilərinə qarşı hörmətsizlik edir”.

Baş icraçı direktor bildirib ki, “Azercell”in yaydığı açıqlamanı eşidəndə şoka düşüb: “Hazırda şəbəkələr arasında arabağlantıda problem yaranmaması üçün “Azercell”lə və digər operatorlarla danışıqlar aparılır ki, gələcəkdə danışıqlar zamanı bu şirkətlərin abonentləri əziyyət çəkməsinlər”.

Xatırladaq ki, iyulun 21-də “Azercell”in yaydığı açıqlamada qeyd olunurdu ki, “Azerfon” MMC-nin (NarMobile) hər iki operatorun abunəçilərinin bir-biri ilə mobil rabitə əlaqəsi saxlaya bilməsi üçün arabağlantı müqaviləsi üzrə 1 il ərzində borcunu ödəməməsi “Azercell”-in fəaliyyətinə ciddi zərər vurur. Artıq bu borc 11 milyon manata çatıb və dəfələrlə edilən rəsmi müraciətlərə baxmayaraq, bu borcun ödənilməsi istiqamətində “Azerfon” MMC tərəfindən heç bir addım atılmayıb. Xəbərdarlıq olunurdu ki, buna görə də şəbəkələr arasındakı mövcud arabağlantı kanalları 22 iyul saat 00:00-dan etibarən kəsiləcək və borc ödənənə qədər “Azerfon” və “Azercell” abunəçiləri bir-birlərinə zəng edə bilməyəcəklər.

Gido Helbix 11 milyon manat borc məsələsinə aydınlıq gətirməyib.

Pərvin Abbasov / Lent.az